MEHNAT, BARAKA VA FIDOYILIK TIMSOLI

2025-10-15

Самарқанд қишлоқ аёллари – оила ва жамият таянчи

Бугунги кунда Самарқанд вилоятининг қишлоқ ҳудудларида минглаб аёллар турли соҳаларда фаолият олиб бормоқда. Улар нафақат оилада, балки деҳқончилик, чорвачилик, ҳунармандчилик ва тадбиркорлик билан шуғулланиб, маҳаллий иқтисодиётнинг юксалишига салмоқли ҳисса қўшмоқда.
Опа-сингилларимизнинг сабр-тоқати, меҳнатсеварлиги ва фидойилиги Самарқанднинг қишлоқларида ҳаёт барқарорлиги ва фаровонлигини таъминлаб келмоқда.

Аёлларни қўллаб-қувватлаш – вилоят сиёсатининг муҳим йўналиши

Сўнгги йилларда Самарқанд вилоятида аёлларни, айниқса, қишлоқ аёлларини ижтимоий ва иқтисодий жиҳатдан қўллаб-қувватлашга алоҳида эътибор қаратилмоқда. Хусусан, аёллар тадбиркорлигини ривожлантириш бўйича вилоят ҳокимлиги ва банклар томонидан имтиёзли кредитлар ажратилмоқда. Шунингдек, касб-ҳунарга ўқитиш марказлари орқали минглаб аёллар тикувчилик, паррандачилик, гўзаллик салони хизматлари каби соҳаларда янги касб эгаллаб, ўз бизнесини йўлга қўймоқда.
Кўплаб аёллар маҳалла фаоллари, ўқитувчилар, соғлиқни сақлаш ходимлари, фермерлар ва ҳатто туман кенгашларига депутатлар сифатида фаол иштирок этмоқда.

Меҳнат фахри – халқ эътирофи

Бугун Самарқанд вилоятининг турли туманларида ўз меҳнати билан ажралиб турган кўплаб қишлоқ аёллари бор. Масалан, Нарпай туманида сабзавотчилик билан шуғулланаётган аёллар кооперацияси йилига юзлаб тонна маҳсулот етиштириб, экспортга ҳам чиқаришни йўлга қўйди. Иштихонда эса ёш аёллар стартап лойиҳалари орқали ўз ҳунарларини даромад манбаига айлантиришмоқда. Пахтачида бир гуруҳ аёллар бирлашиб, ипак қурти парваришлаш орқали юзлаб оилаларга иш ўринлари яратган.
Самарқанднинг қишлоқ аёллари – бу ҳаёт баракаси, меҳнат ва сабр тимсоли. Улар нафақат ўз оиласи, балки жамият, вилоят, қолаверса, бутун юртимиз тараққиётида фаол иштирок этмоқда. Халқаро қишлоқ аёллари куни уларнинг меҳнатини қадрлаш, эътироф этиш ва ҳар бир аёлга ҳурмат билан ёндашиш зарурлигини яна бир бор эслатади.