MEHNAT, BARAKA VA FIDOYILIK TIMSOLI

2025-10-15

Samarqand qishloq ayollari – oila va jamiyat tayanchi

Bugungi kunda Samarqand viloyatining qishloq hududlarida minglab ayollar turli sohalarda faoliyat olib bormoqda. Ular  nafaqat oilada, balki dehqonchilik, chorvachilik, hunarmandchilik va tadbirkorlik bilan shug‘ullanib, mahalliy iqtisodiyotning yuksalishiga salmoqli hissa qo‘shmoqda.

Opa-singillarimizning sabr-toqati, mehnatsevarligi va fidoyiligi Samarqandning qishloqlarida hayot barqarorligi va farovonligini ta’minlab kelmoqda.

Ayollarni qo‘llab-quvvatlash – viloyat siyosatining muhim yo‘nalishi

So‘nggi yillarda Samarqand viloyatida ayollarni, ayniqsa, qishloq ayollarini ijtimoiy va iqtisodiy jihatdan qo‘llab-quvvatlashga alohida e’tibor qaratilmoqda. Xususan, ayollar tadbirkorligini rivojlantirish bo‘yicha viloyat hokimligi va banklar tomonidan imtiyozli kreditlar ajratilmoqda. Shuningdek, kasb-hunarga o‘qitish markazlari orqali minglab ayollar tikuvchilik, parrandachilik, go‘zallik saloni xizmatlari kabi sohalarda yangi kasb egallab, o‘z biznesini yo‘lga qo‘ymoqda. 

Ko‘plab ayollar mahalla faollari, o‘qituvchilar, sog‘liqni saqlash xodimlari, fermerlar va hatto tuman kengashlariga deputatlar sifatida faol ishtirok etmoqda.

Mehnat faxri – xalq e’tirofi

Bugun Samarqand viloyatining turli tumanlarida o‘z mehnati bilan ajralib turgan ko‘plab qishloq ayollari bor. Masalan, Narpay tumanida sabzavotchilik bilan shug‘ullanayotgan ayollar kooperatsiyasi yiliga yuzlab tonna mahsulot yetishtirib, eksportga ham chiqarishni yo‘lga qo‘ydi. Ishtixonda esa yosh ayollar startap loyihalari orqali o‘z hunarlarini daromad manbaiga aylantirishmoqda. Paxtachida bir guruh ayollar birlashib, ipak qurti parvarishlash orqali yuzlab oilalarga ish o‘rinlari yaratgan.

Samarqandning qishloq ayollari – bu hayot barakasi, mehnat va sabr timsoli. Ular nafaqat o‘z oilasi, balki jamiyat, viloyat, qolaversa, butun yurtimiz taraqqiyotida faol ishtirok etmoqda. Xalqaro qishloq ayollari kuni ularning mehnatini qadrlash, e’tirof etish va har bir ayolga hurmat bilan yondashish zarurligini yana bir bor eslatadi.